Ward no 4

श्रवणकुमार समाधि स्थल 

पितृभक्त श्रवणकुमार पानीको खोजीमा यसै ठाउँ घ्याङ्स्याङदीमा आई दहमा गाग्रो डुवाउँदा शिकार खेल्न आएका राजा दशरथले मृगको आवाज ठानी शब्दभेदी वाण हान्दा श्रवणकुमारलाई लाग्यो र उनी मरणासन्न छटपटाहटको अवस्थामा चित्कारपूर्ण आवाज सुनी राजा दशरथ त्यहाँ आउदा श्रवणकुमारले आफ्नो बेलीबिस्तार सुनाउदै यसै स्थानमा ब्रह्मालिन भए । त्यसै वेलादेखि श्रवणकुकारले देह त्याग गरेको त्यस पोखरीको पानी रगत जस्तो रातो देखिन थालेको भन्ने किंवदन्ती छ । आफ्नै भान्जाको हत्या गरेको हुनाले राजा दशरथलाई श्राप लागेको हुनाले यही पोखरीबाट वग्ने खोलालाई सरापी खोला भन्न थालियो । पछि अपभ्रंश हुदै यस खोलाको नाम सरादीखोला रहन पुग्यो । उही बेलादेखि रातो पानी वगेको देखिने सरादी खोला र आँशु जस्तै देखिने अन्धाअन्धी खोला वडा नं. २ मा पर्ने देभिल्लामा मिश्रित भई एउटै खोलाको रुपमा वग्ने गर्दछन् । जसलाई संयुक्त रुपमा आँधीखोला नै भनेर चिनिन्छ । यो श्रवण कुमार समाधीस्थल क्षेत्र धार्मिक एवं पौराणिक रुपमा अति पवित्र र पित्तृ उद्धारको महत्वपूर्ण स्थलको रुपमा स्थापित रहेको छ ।यस स्थानमा श्रवणकुमारको मृतशिला अवस्थित छ । यही स्थानमा मन्दिर बनाई पूजा आजा गर्ने गरिन्छ भने बालाचतुर्दशीको दिन विशेष मेला लागी भजन किर्तन सहित सद्बीज छर्ने गरिन्छ । यस क्षेत्रदेखि अन्धाअन्धी क्षेत्रसम्म सद्विज छर्दै जाँदा पितृहरुले पाउने विश्वास गरिन्छ ।