Ward no. 2

गायत्री पाञ्चायतन मन्दिर ः 

गायत्री पाञ्चायतन मन्दिर आँधीखोला गाउँपालिका वडा नं. २ चिलाउनेबास, काफलटारीमा रहेको छ । यो मन्दिर गुरुकुल वेद विद्याश्रम मा.वि.को परिसर भित्र छ । समग्र वैदिक विज्ञानको सार संग्रहित जसलाई हामीले बह्मविद्याका रुपमा चिन्दछौ र नित्य सन्ध्योपासना गरी यथाशक्य जप गर्छौ त्यस्तो मोक्षदायक शक्तिदायक अदृष्यशक्तिले भरिपूर्ण गायत्री मन्त्रद्वारा उपास्या प्राणकी अधिष्ठात्री देवी वेद जननी र सवै देवताद्वारा उपस्या गायत्री देवी, सार सृष्टिकी उत्पत्तिकर्ता सावित्री र विवेक ,ज्ञान र बुद्धिधात्री सरस्वती यी त्रिशक्ति देवीलाई एकै केन्द्रमा राखेर निर्माण गरिएको गायत्री पाञ्चायतन मन्दिर नेपालकै उत्कृष्ट र नमूना मन्दिर हो । पाँचवटा देवताको समुदायलाई पाञ्चायतन भनिन्छ । जसमा गणेश, सूर्य, विष्णु, शिव र देवी पर्दछन् । गणेशलाई पृथ्वीतत्व, सूर्यलाई तेजतत्व, विष्णुलाई जलतत्व, शिवलाई आकाशतत्व र देवीलाई शक्तिमान वायुतत्वको प्रतीकको रुपमा लिइन्छ । यिनै पञ्चदेव हुन् यसलाई पाञ्चायतन शव्दले परिभाषित गरिएको छ । गायत्री, सावित्री र सरस्वतीलाई मध्य भागमा र पञ्च प्रकृतिका अधिष्ठाता देवताहरुलाई बाहिरी भागमा राखिएको हुनाले गायत्री पाञ्चायतन नाम रहन गएको हो । यसर्थ यो मन्दिरको महिमा अपरम्पार छ । हिन्दू धर्ममा गायत्रीलाई महत्वपूर्ण शक्ति मानिन्छ । यहाँ गुरुकूलमा अध्ययन गर्ने वटुकहरुबाट नियमित पुजा गरिन्छ । विशेष गरी नवदुुर्गा र श्रीपञ्चमीमा भक्तजनहरु भेला भई पुजा आजा गर्छन्